30 тысяч вернікаў удзельнічалі ва ўрачыстасцях у Будславе

Удзел у іх, па ацэнцы прэс-сакратара Канферэнцыі каталіцкіх біскупаў Беларусі ксяндза Юрыя Санько, узялі ў суме каля 30 тыс. чалавек. З іх — каля 3 тыс. пілігрымы, якія прыбылі ў Будслаў пешшу і на роварах.

Найбольшая пілігрымка прыбыла з Маладзечна – больш за 300 чалавек, самая ж даўгая пілігрымка была з Баранавічаў.

Сёлета ўрачыстасці ў Будславе супалі таксама з адзначэннем 25-годдзя заснавання Мінска-Магілёўскай мітраполіі, у сувязі з чым у Беларусь прыбыў Папскі легат, арцыбіскуп Венскі, кардынал Крыстоф Шонбарн.

Кульмінацыйную Святую Імшу, якая распачалася апоўначы працэсіяй са свечкамі вакол плошчы ля святыні, узначаліў мітрапаліт Мінска-Магілёўскі арцыбіскуп Тадэвуш Кандрусевіч. Пасля працэсіі прагучала малітва падзякі за дар свабоды веравызнання і 25-годдзе заснавання Мінска-Магілёўскай мітраполіі, удзел у якой ўзяў Папскі легат кардынал Шонбарн.

Адной з самых важных падзеяў будслаўскай ночы стала ўручэнне Папскім легатам беларускім грэка-каталікам рэліквіі святога Язафата Кунцэвіча.

Падчас Імшы папскі пасланнік кардынал Крыстаф Шонбарн перадаў беларускім грэка-католікам рэліквію св. Язафата Кунцэвіча — набедранік, частку яго арцыбіскупскага адзення.

Удзел у заключнай Святой Імшы ўзялі прадстаўнікі Беларускай Праваслаўнай Царквы. Ад імя мітрапаліта Мінскага і Заслаўскага Паўла, Патрыяршага Экзарха ўсяе Беларусі, са словамі вітання да каталіцкага духавенства і вернікаў звярнуўся протаіерэй Аляксандр Шымбалёў, паведамляе партал Krynica.info.