«Карагод вышыванак» прайшоў у Віцебску на Дзень горада (фота)

Ці то вінаватая спёка, ад якой віцябляне хаваліся на прыродзе, ці то кепская арганізацыя і адсутнасць рэкламы, але ў гістарычна-культурніцкім цэнтры «Золотое кольцо Витебска — Двина» гледачоў прыйшло надзвычай мала. Удзельнікаў было яшчэ менш. Апрача насельнікаў экалагічнай сядзібы «Звон-гара», якія ўдзельнічалі ў невялікім кірмашы на падворку, амаль ніхто і не прыйшоў у вышытых строях, паведамляе "Радыё Свабода".

Але імпрэза «Карагод вышыванак», якая літаральна напярэдадні змяніла свой назоў, атрымалася хоць нешматлюднай, ды даволі вясёлай. Да карагоду далучыліся і артысты мясцовай мастацкай самадзейнасці, якія вучыліся народным танцам ад аматараў здаровага ладу жыцця са «Звон-гары».

Тут жа, на падворку культурніцкага цэнтру ў Задзвінні прэзэнтавалі публіцы драўляную скульптуру княгіні Вольгі — заснавальніцы Віцебска, калі верыць не пацьверджанай навукоўцамі легендзе.

Леанід Саўчанка

Аўтар, народны майстар Леанід Саўчанка, выразаў жаночую фігуру з мячом з асіны, і гэта тут жа спарадзіла новую традыцыю. Паводле фальклорных уяўленняў, асіна мае здольнасьць супакойваць нервы. Таму варта абняць статую княгіні Вольгі і сказаць «асіна-асіна, забяры маю трасіну», каб супакоіцца пасьля нейкага ўзрушэння і зноў набыць душэўную раўнавагу. Так, прынамсі, раяць у гістарычна-культурніцкім цэнтры.