У Віцебску ўсталявалі помнік Неўскаму, нягледзячы на пратэсты грамадскасці

Устаноўка помніка праходзіла нервова: з першага разу паставіць скульптурную кампазіцыю на прызначанае месца не атрымалася - не супалі канструкцыйныя элементы. Адзін з кіраўнікоў працэсу пастаянна азіраўся, казаў сваім калегам, што «назіраць сабраліся гэтыя нефармалы», і прапаноўваў складаць адміністрацыйныя пратаколы на ўсіх, хто фатаграфуе, перадае "Радыё Свабода".

Помнік Аляксандру Неўскаму ставілі на пастамент гадзіны з паўтара. За гэты час паміж мінакамі адбылося нямала спрэчак, ці патрэбны Віцебску такі помнік.

Адкрыццё скульптуры, якая паказвае сустрэчу князя з жонкай і сынам, запланавалі на 24 чэрвеня, калі ў Віцебску святкуюць Дзень горада.

Пастамент для помніка быў падрыхтаваны яшчэ некалькі гадоў таму, але да гэтага часу выконваў ролю клюмбы. Цяпер да яго ладзяць новыя брукаваныя сцежкі, парадкуюць газоны.

Ідэя ўсталяваць помнік Аляксандру Неўскаму належыць віцебскім гарадскім уладам. Прапанова была выказана яшчэ ў 2009 годзе, тады ж быў праведзены конкурс скульптурных праектаў. Але пазней праект-пераможца быў яшчэ некалькі разоў заменены.

У адказ на пратэсты віцяблян, якія кажуць пра адсутнасць гістарычных сувязяў паміж Віцебскам і расійскім князем, улады прыдумалі аргумент. Маўляў, гэта будзе не помнік Аляксандру Неўскаму, а скульптурная кампазіцыя, якая ўвасабляе сямейныя каштоўнасці, бо другой жонкай Аляксандра Неўскага была Віцебская князёўна Аляксандра.