Валянціна Быкава — у рэанімацыі Віцебскага абласнога шпіталя

У сястры пісьменніка дыягнаставаная посттраўматычная пнеўманія, выкліканая наступствамі пераломаў рэбраў. Пакуль трэба адпампоўваць вадкасць з лёгкіх, яе будуць лекаваць ва ўмовах рэанімацыйнага аддзялення. Потым, ёсць верагоднасць, яе перавядуць зноў у Вушацкі шпіталь.

Апрача рэбраў з левага боку, у Валянціны Уладзіміраўны зламаныя плечавая костка злева і запясце правай рукі. Засталося шмат гематомаў, на адной руцэ гіпс.

Яна пры памяці, але не да канца выйшла са стрэсавага стану. Пазнае людзей, размаўляе з лекарамі, распавядае, што з ёю здарылася.

З жахам згадвае напад, які ўчыніў невядомы рабаўнік 27 траўня:

— Я пачула шоргат у бакоўцы, убачыла нейкі цень. Пайшла паглядзець. На мяне нехта накінуўся ззаду, схапіў за галаву, потым за горла, калі я закрычала. А потым шпурнуў мяне, я ўпала, ударылася, пабілася аб парог. Нягоднік уцёк, я яго не разгледзела і не пазнала.

За пару дзён да здарэння Валянціна Быкава атрымала пенсію. Можа, на гэтыя два з нечым мільёны і паквапіўся зламыснік.

Аднавяскоўцы з вёскі Ваўчо Ушацкага раёну кажуць, што цяпер таксама баяцца нападаў. Раней нічога падобнага тут не здаралася, піша Радыё Свабода.