Самую вялікую «георгіеўскую стужку» Беларусі знялі... да наступнага года

Знікненне самай вялікай у Беларусі 150-метровай «георгіеўскай стужкі» са сцяны аграсядзібы на Магілёўшчыне заўважыў карэспандэнт Свабоды.

У сядзібе пацвярджаюць: стужку знялі, бо «святы прайшлі, чаго ж яна вісець будзе». Але на наступны год «па-любому» вернуць.

На пытанне, як адміністрацыя ставіцца да цяперашняга значэньня чорна-аранжавай стужкі як сімвала расійскага шавінізму, вайны ва Украіне і «сепаратыстаў» на Данбасе, суразмоўца сказаў: «Што вы лухту нейкую пытаеце?» А затым удакладніў, ці карэспандэнт Свабоды не сепаратыст.

«Вы пачытайце, што гэта такое, сімвал чаго гэта! Гэта наогул гвардзейская стужка, гісторыю хоць вывучайце», — кажа прадстаўнік сядзібы.

На ўдакладненне, што падчас Другой сусветнай вайны «гвардзейская стужка» савецкім бокам не ўжывалася (колеры ўжываліся на сцягах гвардзейскага злучэння, на Ордэне Славы 1943 года і медалі «За перамогу над Германіяй» 1945 года, стужка ж выкарыстоўвалася тымі, хто ваяваў на баку нацысцкай Нямеччыны), суразмоўца перапытаў:

«А да чаго тут „на вайне“? Канечне, царскай гвардыі! Мы шануем сваю гісторыю, што мне з вамі размаўляць?»