Для затрыманых у Жодзіне актывістаў адмовіліся прыняць ваду і ежу

Паводле сустаршыні БХД Паўла Севярынца, у турме трымаюць прадпрымальніка і грамадcкага актывіста Алеся Макаева, актывіста БХД Паўла Пракаповіча, гомельскага прадпрымальніка Міхала Латышава і актывіста «Маладога фронту» Паўла Старавойтава. Пра ўмовы іх утрымання нічога невядома.

«Учора вызвалілі толькі Алеся Абрамовіча, бо ён інвалід. А калі ён спрабаваў перадаць хлопцам у ізалятар ваду і ежу, дык міліцыянты адмовіліся прымаць, сказалі прыходзіць у панядзелак, бо пакуль"няма начальства". Мяркую, суды над затрыманымі пачнуцца ў панядзелак, у Жодзіна. Судзіць будуць 6 чалавек, яшчэ Івана Помаза і Алеся Абрамовіча, на якіх таксама склалі пратаколы», — паведаміў карэспандэнту "Радыё Свабода" Павал Севярынец.

29 траўня аргкамітэт прафсаюзу «Салідарнасць» зладзіў на рынку ў Жодзіна мітынг салідарнасці з прадпрымальнікамі, якія пратэстуюць супроць 222 указу Аляксандра Лукашэнкі. Паводле сведак, акцыя доўжылася каля 40 хвілін. Пасля мітынгу, які міліцыя здымала на відэа, актывісты пачалі хадзіць па рынку і раздаваць людзям агітацыйныя матэрыялы. Тады паступіў загад і ўсіх актывістаў затрымалі.

«Гэтак у Беларусі нараджаецца наша «Салідарнасць», — мяркуе актывіст апазіцыі Павал Севярынец.