Amnesty International асудзіла пакаранне смерцю Сяргея Іванова

Сям’я Сяргея Іванова даведалася пра гэта толькі ў траўні, пасля таго як прысуд быў прыведзены ў выкананне. Сваякі не атрымалі ніякага папярэджання, ім не далі права на апошнюю сустрэчу з Івановым. У адпаведнасці з беларускім заканадаўствам яго цела ня будзе вернута ім для пахавання, і месца пахавання ня будзе раскрывацца, паведамляе «Радыё Свабода». Асабістыя рэчы Іванова не былі вернутыя сям’і. Цяпер сям’я павінна атрымаць ад беларускіх уладаў пасведчанне аб яго смерці.

У сакавіку 2015 году Сяргей Іваноў быў прызнаны вінаватым у забойстве 19-гадовай жанчыны ў 2013 годзе і прысуджаны да смерці. Камітэт ААН па правах чалавека прасіў аб адтэрміноўцы выканання на час разгляду гэтай справы. Такія запыты абавязковыя для дзяржаў — удзельніц першага Факультатыўнага пратаколу да Міжнароднага пакту аб грамадзянскіх і палітычных правах. Беларусь далучылася да гэтага пратаколу ў 1992 годзе. Нягледзячы на гэта, і ў парушэнне абавязанняў Беларусі ў галіне правоў чалавека, смяротны прысуд Сяргею Іванову быў выкананы.

Amnesty International заклікае беларускія ўлады неадкладна спыніць усе смяротныя пакаранні і ўсталяваць мараторый з мэтай адмены смяротнага пакарання.

Прынамсі тры чалавекі застаюцца ў камеры смяротнікаў у Беларусі. Гэта Іван Кулеш, Генадзь Якавіцкі і Сяргей Хмялеўскі. Amnesty International заклікае беларускія ўлады спыніць ужо запланаваныя смяротныя пакаранні і неадкладна адмяніць вынесеныя смяротныя прысуды.