Сёння ў Беларусі адзначаюць Радаўніцу

У Радаўніцу беларусы наведваюць могілкі, моляцца аб супакоі душ сваіх блізкіх і дзеляцца з імі радасцю ад уваскрасення Хрыста. 

Па традыцыі ў гэты дзень непажадана штосьці сеяць або садзіць. Напярэдадні Радаўніцы гаспадыні гатавалі стравы для памінання на могілках, прычым колькасць страў павінна была быць няцотнай. Усё прыгатаванае складвалася ў вялікую палатняную хустку, туды ж клалі асвечаныя на Вялікдзень фарбаваныя яйкі. Раніцай людзі ішлі ў царкву, паміналі блізкіх, а пасля абеду адпраўляліся на могілкі.

Жанчынам над магіламі належала галасіць, а мужчыны павінны былі качаць асвечанае яйка са словамі "Хрыстос уваскрэс". Затым усе моўчкі рассаджваліся вакол магілы і даставалі стравы. Урачыстая трапеза пачыналася з запрашэння нябожчыка. Пасля трапезы крыху ежы і пітва пакідалі для памерлых, а рэшткі раздавалі жабракам.

Сення з наведвальнікаў, якія прыбылі на гарадскія могілкі Мінска на аўтамабілях, плата за ўезд спаганяцца не будзе. Пра гэта паведаміў намеснік дырэктара УП «Спецкамбінат КБА» Сяргей Тур.

Ен распавеў, што ў летні перыяд гарадскія могілкі пачынаюць працу з 08:00. Але калі на Радаўніцу хтосьці прыедзе раней, перашкаджаць работнікі могілак не будуць, сказаў Сяргей Тур агенцтву «Мінск-Навіны».

«Масавае наведванне месцаў пахаванняў традыцыйна пачынаецца пасля 10:00 і працягваецца прыкладна да 15:00. Калі ёсць магчымасць, пажадана прыехаць раней ці крыху пазней », - сказаў намеснік дырэктара.