Будаўнікі з Гродзеншчыны масава з’язджаюць у Калінінград

Галоўная прычына – адсутнасць працы на будоўлях рэгіёну, паведамляе «Радыё Рацыя». У Прынёманні сёлета істотна зменшыліся аб’ёмы будаўніцтва паводле дзяржаўнай замовы з-за адсутнасці сродкаў, паведаміў старшыня Гродзенскага абласнога выканаўчага камітэту Уладзімір Краўцоў.

– Закончыліся дзяржаўныя заказы, перасталі будаваць комплексы, фермы, не тыя маштабы будаўніцтва жылля. Няма зараз у дзяржавы рэсурсаў, каб з размахам будаваць, а на новыя формы, на іпатэку, на жыллёвыя субсідыі мы не перайшлі.

У параўнанні з мінулым годам на Гарадзеншчыне ў два разы зменшылася будаўніцтва жылля – гэта тычыцца як тых, хто будуецца на агульных умовах, так і льготныя катэгорыі грамадзян. У сувязі з фінансавым крызісам, своечасова не атрымаюць жыллё інваліды, шматдзетныя сем’і і тыя асобы, якія чакаюць на атрыманне кватэры больш за 10 гадоў.