Двум затрыманым раварыстам пагражае да 6 год зняволення

Паводле Праваабарончага цэнтру «Вясна», у мінскай гарадской міліцыі на двух удзельнікаў роварнай акцыі «Крытычная маса», якая праходзіла ў Мінску 29 красавіка і была спыненая міліцыяй, заведзеныя крымінальныя справы паводле 2 часткі 339 артыкулу Крымінальнага кодэксу. Гэта артыкул пра аказанне супраціву супрацоўніку міліцыі, які спыняе хуліганства.

Раніцай 2 траўня ў мінскай гарадской міліцыі інфармацыю пра завядзеньне крымінальных спраў на Станіслава Канавалава і Дзмітрыя Паліенку не пацвердзілі, але і не абверглі, піша "Радыё Свабода".

«Звесткі ёсць, але іх трэба яшчэ ўзгадніць», — сказаў кіраўнік прэс-службы ГУУС Мінска Аляксандар Ластоўскі.

29 красавіка ў Мінску былі затрыманыя больш за 10 раварыстаў, якія сабраліся на акцыю «Крытычная маса» з мэтай прадэманстраваць уладам недахопы роварнага руху па вуліцах гораду. Паводле затрыманых раварыстаў, з імі абыходзіліся вельмі жорстка, у тым ліку збівалі. Большасць затрыманых адпусцілі, але Станіслава Канавалава і Дзмітрыя Паліенку пакінулі ў пастарунку.

Па звестках «Вясны», 30 красавіка ў кватэры раварыста Станіслава Канавалава адбыўся ператрус, у яго забралі цвёрды дыск кампутара. Тады ж стала вядома пра пагрозу завядзення на раварыста крымінальнай справы за хуліганства.