Святлана Алексіевіч прыехала ў Літву без візы, але на дыпламатычнай машыне

У пятнiцу нобелеўская лаўрэатка, якую чакалi у Вiльнi, ня выйшла з цягнiка. Кiраўнiк Панявескага драматычнага тэатру імя Юозаса Мiльтiнiса, якi чакаў яе, літаральна аслупянеў, бо ня быў папярэджаны, што Святлана Алексiевiч не прыедзе, паведамляе Служба навінаў Літоўскай тэлевізіі.

Яна была запрошаная на прэм’еру спектаклю, пастаўленага паводле яе кнiгi «Чарнобыльская малiтва», i на дыскусiю з гледачамi.

Калi высветлiлася, што пiсьменнiца не паспела падаць дакументы на вiзу, на просьбу мiнiстра замежных справаў Літвы Лінаса Лінкявічуса яе прывезлi з Мінску ў Панявежыс на машыне лiтоўскай амбасады ў Беларусi, паведамляе «Радыё Свабода».

Ужо ў Панявежысе яна расказала, што яе жыццё змянiлася пасля атрымання прэмii — цяпер яна шмат падарожнiчае, дае iнтэрвію, а часу пiсаць новую кнiгу пра каханне застаецца мала.

«Шалёны рытм. Не магу нiводнага слова спакойна вымавiць, пра нешта прагаворышся ў самалёце або сябру скажаш — а заўтра ўжо чытаеш у газетах», — сказала нобелеўская лаўрэатка.

Пiсьменнiца сказала, што яна ездзiць не на ўсе прэм’еры, пастаўленыя паводле яе твораў, але ад запрашэння ў Панявежыс не магла адмовiцца.

«У студэнцкія часы ўсе гаварылі пра Панявежыс, пра тэатр, пра актора Баніёнiса, таму i згадзiлася. Назва Панявежыс мела чароўны уплыў на маё рашэнне», — прызналася Святлана Алексiевiч.