Уладзімір Мацкевіч атрымаў позву ў суд за ўдзел у акцыі, на якой не быў

Пра гэта філосаф і метадолаг паведаміў у сваім Фэйсбуку.

Уладзімір Мацкевіч расказаў карэспандэнту Свабоды, што на мітынгу ён не быў.

«Я наогул не хацеў ісці на гэты суд, бо мяне там не было. Але тут яны прыслалі новую позву. Я не ведаю, чаму позва прыйшла мне, бо я там не быў. Як звычайна, відаць, выклічуць сведкаў-міліцыянтаў, якія скажуць, што бачылі мяне, ды і ўсё. Я думаю, што яны проста папаўняюць такім чынам бюджэт. Раней былі такія выпадкі, калі я проста ігнараваў такія позвы і нікуды не хадзіў. Звычайна нічога і не адбывалася. А тут і па тэлефоне мяне даставалі, і СМС прыслалі, калі я не браў позву на пошце. Напэўна, давядзецца пайсці на гэты суд», — сказаў Мацкевіч.

Раней Мацкевіча выклікалі да следчага, і калі філосаф не з'явіўся, то быў складзены пратакол за нез'яўленне па позве.

«Наш суд вядома які: раней яны асуджалі аднарукага за хлапкі рукамі, нейкага нямога за тое, што лаяўся матам. Цяпер за ўдзел у акцыі, на якой не быў», — адзначыў Уладзімір Мацкевіч.

Як паведамлялася, учора суд Цэнтральнага раёна сталіцы вынес шэраг абвінаваўчых прысудаў на адрас удзельнікаў мітынгаў прадпрымальнікаў.