ААН ладзіць у Мінску міжнародную канферэнцыю па смяротным пакаранні

Мерапрыемства арганізавана прадстаўніцтвам ААН у Беларусі і Міністэрствам замежных спраў пры фінансавай падтрымцы брытанскага пасольства, паведамляе "Радыё Свабода".

Для ўдзелу ў канфэрэнцыі запрошаны эксперты з шэрагу краін. У тым ліку ў форуме возьме ўдзел адмысловы прадстаўнік Еўразвязу па правах чалавека Стаўрас Ламбрынідзіс, які напярэдадні прыехаў з візітам у Беларусь. Таксама ў канфэрэнцыі возьмуць удзел спецдакладчык Парламенцкай асамблеі Рады Еўропы па сітуацыі ў Беларусі Андрэа Рыгоні, старшыня камітэту па замежных справах Палаты дэпутатаў Чэхіі Карэл Шварцэнберг, пасол Вялікабрытаніі ў Беларусі Фіёна Гіб, прадстаўнік ПРААН у Беларусі Санака Самарасінха, прадстаўнікі беларускага ўраду, Беларускага Хельсінскага камітэту.

За ўсю гісторыю незалежнай Беларусі было вынесена 406 смяротных прысудаў, прычым два апошнія — за няпоўныя два месяцы гэтага года. Адзін з іх быў вынесены 15 лютага, у дзень зняцця Еўразвязам санкцый у дачыненні да Беларусі, нягледзячы на тое, што ў рашэнні Рады ЕЗ аб зняцці санкцый асобным радком гаворыцца пра неабходнасць увядзення мараторыя на смяротнае пакаранне як першага кроку да яго поўнай адмены.

Беларусь — адзіная еўрапейская краіна, дзе ўжываюць смяротнае пакаранне. Гэта адна з прычын, чаму Беларусь не ўваходзіць у Раду Еўропы, адзначаюць у праваабарончым цэнтры «Вясна», прадстаўнікі якога ўжо шмат гадоў вядуць кампанію супроць ужывання ў Беларусі смяротнага пакарання. Адметна, што арганізатары міжнароднай канферэнцыі ў Мінску праваабаронцаў з «Вясны» не запрасілі.