Вокам пярэхадня

Здавалася, папраўней бы гучала – Чырвоназорная, аде дзе ж, сёння ўсе разумныя, па дзесяць класаў паскончвалі, хто там у каго будзе кансультацыі браць ці чыёй рады слухаць.

 Асабліва непрыгожа выглядае правая  палова могілак, з, аднолькавага выгляду, пафарбаванымі маслянай брыдкай фарбай, часам паламанымі, крыжамі і агароджамі,  з пакрышанымі надмагільлямі.

Крыжы варыліся з вадаправодных трубаў, і хрысціянскі сімвал прыгадваюць даволі адносна, таблічак з імёнамі і прозвішчамі на іх амаль няма. А самыя магілы засыпаныя брудна-жоўтаю ясеневай лістотай і кавалкамі гальля, скачуць па іх і цяўкаюць шэра-чорныя каўкі…

Адным словам, элегічнасці і прыгажосці, якая ўласцівая ўсім крыху занядбаным і напалову закінутым могілкам, тут і спаміну няма, гэтыя, на жаль, хутчэй нагадваюць сметнік.

Нібы стаіць пасярод іх дзейнічаючая царква, павінен там быць і бацюшка, а раз ёсць гаспадар, то гэтая ўся парафія – ягонае. Але  царква абкружаная будаўнічымі прыстасаваннямі, горбамі дошак, відаць, у бацюшкі на сёння ёсць справы больш пільныя і сур’ёзныя.

Вайсковыя могілкі калісь, пэўна, планавалася пераўтварыць у нацыянальны пантэон, нездарма ж тут пахаваныя Колас і Купала, Міровіч і Грыгоніс, генералы і акадэмікі, чырвоныя партызаны і працаўнікі тыпаграфіі імя Сталіна, але, па нейкіх акрэсленых параметрах , могілкі да пантэона не дацягвалі, і іх пакінулі ў спакоі.

Чые яны?

Здаецца , што нічые…

Аднаго дня, у жніўні, бочнаю алейкаю, дзе напачатку яе часам сядзіць дзед  - жабрак з кулямі, увайшоў я на могілкі, і ўбачыў, што да некаторых крыжоў і агароджаў былі дротам прымацаваныя  заламінаваныя паперкі з наступным тэкстам

                               Информация

Согласно акту инвентаризации участков для захоронения кладбища  “Военное “настоящий участок комиссией Мингорисполкома признан неухоженным, а надмогильное сооружение ветхим.

Требуем привести участок для захоронения и надмогильные сооружения в порядок.

В случае невыполнения этого требования по истечении 2-х(двух) лет с даты размещения настоящей информации на участке надмогильные сооружения могут быть демонтированы и утилизированы в соответствии со статьёй 22 Закона Республики Беларусь “О погребении и похоронном деле”

    Дата размещения информации 10 августа 2015 года

                                              Администрация КУП “Спецкомбинат КБО”

Нікаторыя вельмі ветхія магілы былі адмыслова яшчэ пазначаныя крыжыкамі, намаляванымі ружоваю фарбаю.

Наблізіўся я да царквы, і на прыкметным помніку з надпісам…

                        Бянігна Іванаўна Луцэвіч

                           1857-1942

                        Маці народнага паэта Беларусі

                             Янкі Купалы                           

                            Навучыўся я слоў

                            Беларускіх ад маці

                                   Я.Купала

таксама вісела такая паперка з тэкстам…

Ясна, што на наступны дзень яе там не было.Ясна, што яе альбо нехта адказны зьняў альбо нехта патрыятычны сарваў!Толькі ж адлік часу пачаўся з 10 жніўня, і хадзіла прадстаўнічая камісія, якая ацэньвала помнікі не па тым, хто пад імі ляжыць, а па тым, у якім яны стане, і рацыі ёй не адмовіш!

Можна многа чаго казаць з гэтае нагоды, дэманстраваць высокі ўзровень інтэлігентнасці і грамадзянскасці, пафасна і доўга гаварыць…

Мне прымроілася такая жудасная сцэна-апоўначы з магілы устае  Янка Купала, кліча Якуба Коласа, два старыя сябры  накіроўваюцца да месца пахавання Бянігны Іванаўны і пачынаюць нешта там строіць і  прыбіраць…