У Мінску аднавіла працу кнігарня "Галіяфы"

Сёлета ў лютым культурніцкая ўстанова вымушана была пакінуць памяшканне ў будынку на вуліцы Валгаградскай у, куды засялілася напрыканцы 2013 года. Але яшчэ тады кіраўніцтва запэўнівала, што гэта не "пахаванне", а часовае развітанне. Да апошняга дня пляцоўка працавала як творчая прастора, дзе сустракаліся беларускія паэты і пісьменнікі.

Падставай да прыпынення дзейнасці стала новая рэдакцыя закону "Аб гандлі". Паводле яе будынкі, у якіх вядзецца гандаль, павінны быць аформленыя дакументальна, а потым занесеныя ў адмысловы рэестр. Паколькі тагачасны будынак у рэестры не значыўся, гандаль давялося спыніць.

Дырэктар "Галіяфаў" Зміцер Вішнёў мяркуе, што кнігарня мусіць не толькі стаць месцам, дзе можна набыць якасную літаратуру, але і "авангарднай прасторай". "Мы ажывім Траецкае прадмесце, тут будуць ладзіцца разнастайныя імпрэзы і фэсты, а чытачы змогуць сустрэцца з літаратарамі і мастакамі", - сказаў ён.
"Мне падаецца, дзве-тры прыватныя кнігарні для такога еўрапейскага горада як Мінск - гэта вельмі мала. Я лічу, што на кожнай вуліцы ў нас павінна быць па кнігарні!" — мяркуе пісьменнік Альгерд Бахарэвіч, які наведаў урачыстае адкрыццё "Галіяфаў".

На імпрэзу з нагоды адкрыцця кнігарні прыйшлі і іншыя беларускія літаратары, у тым ліку Адам Глобус і старшыня Саюза беларускіх пісьменнікаў Барыс Пятровіч. Паэты Вера Бурлак, Вольга Гапеева, Сяргей Сыс і Андрэй Хадановіч чыталі свае вершы.

Гасцей частавалі кавай і гарбатай, а па заканчэнні афіцыйнай часткі ўсе ахвотныя маглі набыць любыя кнігі з 20%-й зніжкай.