Сёння - міжнародны дзень чытання паэмы "Сымон-музыка"

Арганізатары акцыі радыё "Беларусь" сумесна з Дзяржаўным літаратурна-мемарыяльным музеем Якуба Коласа правядуць тэматычны эфір. На працягу дня будуць гучаць урыўкі вядомага твора не толькі на беларускай мове, але і ў перакладзе на рускую, украінскую, казахскую, англійскую і іспанскую мовы ў выкананні журналістаў радыё "Беларусь" і прадстаўнікоў нацыянальна-культурных супольнасцяў краіны, паведаляе БЕЛТА.
Паэма "Сымон-музыка" ўжо 90 гадоў уваходзіць у залаты фонд беларускай літаратуры. Яе вывучаюць у школе, перавыдаюць з ілюстрацыямі вядомых мастакоў. Гэты літаратурны тэкст - крыніца натхнення для творцаў. Паводле яе матываў пастаўленыя тэле- і радыёспектакль, арт-перфомансы, створана сімфанічная партытура, лібрэта оперы, літаратурная кампазіцыя для чытання. Вядомы скульптар Заір Азгур уключыў у комплекс на плошчы Якуба Коласа ў Мінску кампазіцыйную частку Сымона і Ганны - галоўных персанажаў паэмы.
Свой удзел у акцыі пацвердзілі музеі Расіі, Літвы і Украіны, цэнтральная бібліятэка горада Валгаграда і таварыства беларускай культуры "Спадчына" (Друскінінкай, Літва).
Сёлета адзначаецца  90 гадоў з часу, калі паэма "Сымон-музыка" выйшла асобным выданнем.