7 імпрэзаў, прысвечаных 85-м угодкам Уладзіміра Караткевіча

Мінск

У сталічнай Галерэі сучаснага мастацтва «Ў» (пр. Незалежнасці, 37а) адбудзецца вечарына да 85-годдзя Уладзіміра Караткевіча. У імпрэзе возьмуць удзел старшыня творчага саюзу Барыс Пятровіч, першы намеснік старшыні Алесь Пашкевіч, літаратары Уладзімір Арлоў, Анатоль Верабей, Анатоль Вярцінскі, Леанід Дранько-Майсюк, Сяргей Законнікаў, Уладзімір Някляеў, спявак Алесь Камоцкі.

На вечарыне прэзентуюць часопіс «Дзеяслоў» № 78 з публікацыяй раней не вядомых дзённікаў Караткевіча. Пачатак у 18:30, уваход вольны, паведамляе «Радыё Свабода».

Орша

У гэты дзень на радзіме пісьменніка ў Оршы адбудзецца адкрыццё мастацкай выставы Беларускага Саюзу мастакоў «Зямля пад белымі крыламі — 2015». Адкрываць выставу будзе яшчэ адзін вядомы аршанец — мастак Мікола Купава.

А 16-й гадзіне ў гарадскім цэнтры культуры пачнецца святочны канцэрт, прысвечаны юбілею пісьменніка.

Гродна

29 лістапада — «Уладзімір Караткевіч і хрысціянства». Мастацкая культурна-асветніцкая вечарына.

Возьмуць удзел: даследчыкі Аляксей Пяткевіч, Анатоль Брусевіч, манах Іаан (Бембель), протаіярэй Георгій Рой, іярэй Павал Каспяровіч, рок-спявак Алесь Дзянісаў, бард Таццяна Салаўёва. Літаратуразнаўца Ціхан Чарнякевіч распавядзе пра апублікаваны ў новым нумары «Дзеяслова» дзённік Уладзіммра Караткевіча.

29 лістапада, пачатак а 18.30, актавая заля Свята-Пакроўскага сабора (Гродна, вул. Акадэмічная, 2)

Тэлебачанне

Тэлеканал СТВ запусціў у эфіры акцыю памяці, у якой беларускія артысты чытаюць урыўкі з твораў Караткевіча — з казкі «Чортаў скарб», з аповесці «Сівая легенда», з раманаў «Дзікае паляванне караля Стаха», «Каласы пад сярпом тваім» ды іншых.

Тэлеканал Беларусь-3 пачынаючы з 23 лістапада кожны дзень паказвае мастацкія фільмы і спектаклі паводле твораў Караткевіча. Ужо паказалі фільм «Маці ўрагану», спектакль «Сіняя-сіняя». 25 і 26 лістапада пакажуць «Чорны замак Альшанскі» і дакументальны фільм пра пісьменніка «Сівая легенда».