У Мінску пакажуць арыгіналы Гоі і Пікаса

Экспазіцыю прадстаўляе музей Каралеўскай акадэміі прыгожых мастацтваў Сан-Фернанда (Мадрыд, Іспанія). Адкрываць выставу ў Мінск прыедуць акадэмік Каралеўскай акадэміі мастацтваў Хуан Бордэс і Надзвычайны і Паўнамоцны пасол Рэспублікі Беларусь у Каралеўстве Іспанія і Партугальскай Рэспубліцы Павел Латушка.

Раней экспазіцыя графікі Гоі і Пікаса ўжо выстаўлялася ў лепшых музеях Італіі, Бразіліі, Індыі.

З твораў Пікаса ў Беларусі будуць прадстаўлены працы з серыі «Сюіта Валара», ілюстрацыі да навелы Анарэ дэ Бальзака «Невядомы шэдэўр», а таксама асобныя гравюры — «Паранены пікадор», «Акторская трупа», «Тры жанчыны і тарэадор», паведамляе «Радыё Свабода».

Свае графічныя працы Гоя аб’ядноўваў у вялікія сэрыі: «Капрычас», «Бедства вайны», «Таўрамахія» і «Дыспаратас». У Мінску будуць выстаўленыя найбольш цікавыя творы кожнай з гэтых сэрыяў.

Адкрыццё выставы ў Нацыянальным мастацкім музеі Рэспублікі Беларусь адбудзецца 21 снежня 2015 году, працаваць яна будзе 3 месяцы.