Гродзенскія прадпрымальнікі гатовыя спыніць працу

Мэта чынавенства – пераканаць прадстаўнікоў дробнага бізнесу пачынаць з новага года супрацу з мясцовымі аптовымі пастаўшчыкамі, паведамляе «Радыё Рацыя». Індывідуальныя прадпрымальнікі горада над Нёманам, а гэта каля 5.000 чалавек, маюць намер у адказ спыніць з новага года працу: з 1 студзеня ім забароняць гандляваць без сэртыфікатаў якасці. Акрамя таго, забарона будзе датычыць і назапашанага тавару:

– Нам абяцалі склады, абяцалі дакументы. 1 студзеня набліжаецца, а нічога не зроблена, нічога няма.

Ала Лебедзева, намеснік начальніка ўпраўлення гандлю і паслуг Гродзенскага аблвыканкама:

– Калі ёсць цікавасць іншага боку, нам таксама гэта цікава, бо гэта нашыя кліенты. Мы з імі працуем. Гэта не значыць, што толькі сёння мы вырашылі з імі працаваць.

У выпадку, калі ўлады не адменяць непапулярную пастанову, гарадзенскія прадпрымальнікі маюць намер правесці пратэстныя акцыі і такім чынам спрабаваць адстаяць сваё права на працу. З гродзенскімі прадпрымальнікамі працуюць некалькі незалежных прафсаюзаў, якія маюць намер дапамагчы ў арганізацыі пратэстаў.