"Калі я замаўчу, пастаўце мне валун сівы і крыж на валуне… "

Валун на магілу народнага паэта Беларусі Рыгора Барадуліна ўзяты ў весцы Кублічы, з радзімы Васіля Быкава.

Вага валуна 2,5 тоны. Надпіс на валуне "Рыгор Барадулін. Сын. 1935—2014". Аўтар — Ігар Засімовіч. Вакол помніка, паводле задумы скульптара, знаходзяцца жорны. Даставіць такі цяжкі помнік на магілу звычайным транспартам было немагчыма, бо пахаваны Барадулін усярэдзіне могілак, піша "Наша Ніва".

Таму дастаўку ажыццяўляе авіяцыя Міністэрства па надзвычайных сітуацыях. Да справы спрычыніліся палкоўнік Алег Якаўлеў, першы намеснік кіраўніка авіяцыі МНС палкоўнік Тадэвуш Курсевіч, старшыня Ушацкага райвыканкама Віктар Родзіч, дырэктар камунальнага ўпраўлення райвыканкама Аляксандр Лосеў.

У 1995 г. Рыгор Барадулін напісаў верш "Прашэнне"

Калі я адыду, пастаўце мне
Валун сівы і крыж на валуне.
Засведчыць крыж,
Што адышоў з імшой
Паганец кшчоны,
Уніят душой.

Крумкач, як чорны плач,
На валуне
Спачне, і значыць,
Памяне мяне.

I стрыж, як крыж здранцвелы,
Прамільгне,
Цень студзячы ў труне
На самым дне.

Калі я замаўчу, пастаўце мне
Валун сівы і крыж на валуне…