Былы міністр замежных спраў выкупіў невядомыя лісты Агінскіх

У кулуарах Пётр Краўчанка апавёў, што артэфакты былі набытыя на міжнародных аўкцыёнах і папоўнілі ягоную асабістую калекцыю, дзе ўжо ёсць карціны, кнігі ды іншыя рарытэты, зьвязаныя з Агінскімі. Кошт архіўных знаходак спадар Краўчанка не раскрывае, але кажа, што кожная рэч мае сваю цану: нешта пашчасціла набыць за пару сотняў даляраў, а за нешта давялося раскашэліцца на тысячы. Захоўвацца ўнікальныя экспанаты будуць у "хатнім музеі" ў яго доме ў Раўбічах.

Сваю прывязанасць да сямейства Агінскіх і аднаго з самых яскравых яго прадстаўнікоў — Міхала Клеафаса Агінскага — дыпламат тлумачыць сілай уражання, якое зрабіў на яго паланэз ля-мінор яшчэ ў раннім дзяцінстве, піша "Радыё Свабода". 

Краўчанка непасрэдна спрычыніўся да вызначэння дакладнага месца, дзе Міхал Клеафас Агінскі правёў апошнія 10 гадоў жыцця ў Фларэнцыі — туды ён ад’ехаў са свайго маёнтка ў Залессі. Неўзабаве там усталявалі мемарыяльную дошку на беларускай і італьянскай мовах працы скульптара Валяр’яна Янушкевіча. Спадар Краўчанка таксама сцвярджае, што быў першым беларусам, які трымаў у руках пасведчанне аб смерці Агінскага. Але нашмат прыемней мець справу з прыжыццёвымі дакументамі, напісанымі прыгожым, упэўненым почыркам Міхала Клеафаса.

Апошнімі набыткамі Пятра Краўчанкі сталі чатыры лісты, якія тычацца кіравання маёнткам Баля Коўнацкая. Аўтарства двух з іх належаць Агінскаму. Калекцыянер падкрэслівае ўнікальнасць набытку, бо знайсці штосьці звязанае з Агінскімі на еўрапейскіх аўкцыёнах — вялікая ўдача. 

Прэзентацыя невядомых лістоў і дакументаў роду Агінскіх прайшла ў сталічным Доме дружбы пад акампанемэнт твораў славутага кампазітара. Ансамбль "Вытокі" пад кіраўніцтвам Аляксея Фралова прадставіў фрагменты юбілейнай праграмы, музычную эстафету падхапіў інструментальны ансамбль Маладзечанскага дзяржаўнага каледжу імя Агінскага, якім кіруе блізкі сябра Пятра Краўчанкі Рыгор Сарока.