У Брэсце шукаюць месца для адмысловых графіці - цытат беларускіх класікаў

Месцы для цытат выбітных беларускіх літаратараў шукаюць прадстаўнікі агенцтва рэгіянальнага развіцця "Дзедзіч", паведамляе "Радыё Рацыя".

"У межах праекту "Вулічныя вершы" яны маюць магчымасць змясціць на сценах гарадскіх будынкаў некалькі сучасных графіці, – распавядае прадстаўніца арганізацыі Алена Каховіч. – Зараз ужо адна цытата намаляваная – гэта цытата Максім Багдановіч на Маякоўскага, 46. І яшчэ будуць 2 цытаты беларускіх класікаў Якуба Коласа і Янкі Купалы.

Зараз мы знаходзімся ў пошуку месцаў для іх размяшчэння. Таму, калі ў кагосьці ёсць прапановы – гэта павінна быць сцяна ў цэнтры горада, пажадана, каб яна выходзіла на вуліцу, будынак – у прыватнай уласнасці, то калі ласка пішыце на [email protected] і мы будзем вельмі рады прыйсці і проста намаляваць гэта для вас".

Як падкрэслівае Алена Каховіч, адна з мэтаў праекту "Вулічныя вершы" – гэта папулярызацыя беларускай мовы і культуры. Форму графіці падтрымалі ў межах конкурсу мясцовага паблік-арту.