У Беларусi хочуць стварыць Нацыянальны ўніверсітэт з беларускай мовай навучання

26 верасня ў сядзібе Таварыства беларускай мовы імя Францішка Скарыны ў Мінску падчас сесіі Усебеларускага кангрэса за незалежнасць арганізаваны аргкамітэт Нацыянальнага ўніверсітэта з беларускай мовай навучання, паведамляе "Новы час".

У сесіі ўзялі ўдзел грамадска-палітычныя дзеячы Мечыслаў Грыб, Аляксандр Мілінкевіч, Аляксандр Казулін, Віталь Рымашэўскі, Ірына Дубянецкая, Алег Трусаў, Уладзімір Колас, Міхаіл Пастухоў і Аляксей Марачкін, а таксама сябры Рады кангрэса.

У сваіх выступах эксперты Аляксандр Сядзяка (Таварыства беларускай школы), Павел Церашковіч (Балонскі камітэт) і Уладзімір Колас (Беларускі гуманітарны ліцэй) узнялі праблемы адукацыі на беларускай мове, Беларусі ў Балонскім працэсе і стварэння Нацыянальнага ўніверсітэту.

Найбольшыя спрэчкі разгарэліся, як і чакалася, наконт апошняга пытання. Падчас дыскусіі гучалі розныя думкі і перасцярогі адносна канцэпцыі і месца заснавання будучага ўніверсітэта. Так, Мечыслаў Грыб выказаў асцярожны аптымізм наконт адкрыцця ў сённяшняй Беларусі ўніверсітэта з беларускай мовай навучання. Аляксандр Мілінкевіч распавёў сітуацыю з Еўрапейскім гуманітарным універсітэтам у Вільні (Літва), а таксама сваё бачанне і магчымыя дзеянні па стварэнні Нацыянальнага ўніверсітэта. Аляксандр Казулін падзяліўся досведам дзейнасці Белдзяржуніверсітэта ў 1990-я гады, калі большая палова выкладчыкаў чытала дысцыпліны на беларускай мове. Алег Трусаў прадэманстраваў арыгіналы подпісаў грамадзян (55 тысяч) за адкрыццё Нацыянальнага ўніверсітэта, якія збіраліся ў 1996 і ў 2000-м гадах.

Напрыканцы паседжання быў створаны аргкамітэт Нацыянальнага ўніверсітэта пад сустаршынствам Алега Трусава, Аляксандра Мілінкевіча і Уладзіміра Коласа.

Наперадзе - падрыхтоўка статута і канцэпцыі новай ВНУ.