На Магілёўскім мясакамбінаце зноў крадзяжы: затрыманы намдырэктара

Як паведамілі ва УУС Магілёўскага аблвыканкама, УСК па Магілёўскай вобласці пачало расследаванне крымінальнай справы ў дачыненні да затрыманага. Намеснік дырэктара мясакамбіната падазраецца ў крадзяжы шляхам злоўжывання службовымі паўнамоцтвамі, г.зн. паводле часткі 2 артыкула 210 Крымінальнага кодэкса Рэспублікі Беларусь. 

Гэта не першы факт выяўленага апошнім часам супрацоўнікамі УБЭЗ УУС Магілёўскага аблвыканкама злачынства з боку службовых асоб ААТ "Магілёўскі мясакамбінат". Магчыма, хутка стануць вядомыя імёны саўдзельнікаў учыненага. 

У ліпені член наглядальнага савета ААТ "Магілёўскі мясакамбінат" быў западозраны ў крадзяжы прадукцыі прадпрыемства больш чым на 300 млн рублёў. 

У канцы мая загадчыца магазіна фірменнага гандлю ААТ "Магілёўскі мясакамбінат" была абвінавачаная ў крадзяжы некалькіх мільярдаў рублёў. Крымінальная справа ў дачыненні да яе была распачата падчас расследавання дзвюх іншых спраў аб крадзяжах на прадпрыемстве, піша БелаПАН.