Гродна застаецца без польскага тэлебачання

Жыхары горада польскай нацыянальнасці пазбавіліся магчымасці глядзець тэлебачанне на роднай мове. Шматлікія звароты да манапаліста тэлевізійных сетак – фірмы “Гарант” – не прынеслі плёну, як не прынеслі плёну і звароты да прадстаўнікоў польскага боку, зазначае гродзенец Веслаў Кеўляк:

– У нас каналы пераважна на расейскай, часам на беларускай і нават ангельскай мовах. Польскага тэлебачання няма. Нам вельмі крыўдна, што тут, на мяжы з Польшчай, гэтага тэлебачання надалей няма.

У Гродне праблемы з прыёмам польскага тэлебачання праз кабельныя сеткі пачаліся пасля падзей 2005 года, калі першы канал польскага тэлебачання актыўна асвятляў сітуацыю вакол Саюзу палякаў на Беларусі, нагадвае «Радыё Рацыя». Паводле загаду ўладаў, канал TVP1 быў выкрэслены з вяшчання праз кабельныя сеткі, і замест яго з’явілася тэлебачанне “Polsat”. Пасля пераходу польскага тэлебачання на лічбавы фармат вяшчання два гады таму, з блакітных экранаў гарадзенцаў знік і гэты тэлеканал.