«Віцебскі алфавіт» – cупольнасць Vitebsk4Me стварае каталог адметнасцяў горада

«Гэта не конкурс і не модны праект. Мы прапануем далучыцца да агульнай справы. Гэта няцяжка, не займе больш за дваццаць хвілін, але дапаможа ўмацаваць наш Віцебск, яго прыгожы культурны вобраз», - гаворыцца ў паведамленні cупольнасці Vitebsk4Me.

Ініцыятары стварэння каталога прапануюць падумаць пра найбольш важныя падзеі, асобаў, мясціны з мінулага і сучаснасці Віцебска: «Якія з іх вам хочацца зафіксаваць для нашчадкаў. Якімі рэчамі мы ганарымся тут і зараз? Гэта могуць як канкрэтныя прадметы, так і рэчы, якія ня знойдзеш навобмацак. Абы яны жывілі ваш гонар за Віцебск».

З прапановаў мяркуецца стварыць каталог феноменаў, альбо «Віцебскі алфавіт»: «Кожнай літары беларускага алфавіта мы падорым па адной ўнікальнасці нашага горада. Важнасць вашых прапановаў будзе ацэненая журы, каб кожная літара магла атрымаць толькі адзін але самы важны феномен».

Збор з 32 цікавостак (па колькасці літар беларускага алфавіта) плануецца звярстаць у прыгожы электронны каталог. Таксама кожны жадаючы зможа надрукаваць сабе папяровы варыянт.

Да 15 верасня супольнасць Vitebsk4Me чакае лістоў з віцебскімі адметнасцямі на e-mail: [email protected]

Яны могуць мець наступны выгляд: «Г — Гутэнберг, М — Мачу Пікчу, Т — тэорыя адноснасці, К — «Каласы пад сярпом тваім». «Няхай для вас важны толькі адзін фенамен, і больш нічога не прыходзіць да галавы — дашліце яго нам. Можа менавіта яго будзе не хапаць у «Віцебскім алфавіце», - зазначаюць стваральнікі праекта.