У Гродне рэстаўруюць Пабрыгіцкі кляштар

Рэстаўрацыйныя працы пры ўмове бесперапыннага фінансавання разлічаныя на тры гады. Як зазначае ў гутарцы з «Радыё Рацыя» інжынер тэхнічнага нагляду Мікалай Васілевіч, будаўнікі адказна падыходзяць да справы і маюць намер максімальна захаваць аўтэнтычны выгляд помніка архітэктуры XVII стагоддзя:

– Зараз мы аднаўляем сцены прыбудовы да новага корпусу. Сцены і фундамент знаходзіліся ў аварыйным стане, і пакідаць іх так было нельга. Цэгла пры разборцы была ачышчана і ізноў выкарыстоўваецца для кладкі сцен.

Пабрыгіцкі кляштар і касцёл Дабравешчання Найсвяцейшай Дзевы Марыі былі пабудаваныя у сямнаццатым стагоддзі дзякуючы фундушам надворнага маршалка літоўскага Крыштафа Весялоўскага і ягонай жонкі Аляксандры Марыяны з Сабескіх. Менавіта яны ў 1634 годзе запрасілі ў Гродна ордэн брыгітак і надалі яму некалькі зямельных участкаў у самім горадзе і фальваркі ў Гродзенскім і Ваўкавыскім паветах.