У Гродне жанчына адмовілася ад пашпарта з-за расійскамоўных штампаў

Апошнім часам службы, якія ў Гродне займаюцца афармленнем пашпартоў, пачалі выкарыстоўваць расійскамоўныя штампы аб прапісцы, рэгістрацыі шлюбаў і наяўнасці дзяцей замест беларускамоўных, што для многіх жыхароў горада з’яўляецца асабістай абразай.

- Я зараз мяняю пашпарт і вельмі здзівілася, пабачыўшы, што там стаяць расейскамоўныя штампы. Я адмовілася ад пашпарта. Што гэта такое! Я хачу, каб стаяў той самы беларускамоўны штамп. Беларуская мова для мяне мова асноўная. Я тут жыву, я павінна паважаць, я павінна яе ведаць. І тыя, хто прыязджаюць сюды жыць, таксама павінны ведаць, разумець і паважаць краіну, - заявіла «Радыё Рацыя» адна з незадаволеных навацыямі гарадзенка.

Ва ўпраўленні па грамадзянству і міграцыі Гродзенскай вобласці патлумачылі, што расійскамоўныя штампы былі ўведзеныя замест беларускамоўных яшчэ некалькі гадоў таму. Афіцыйнага дакуманту аб замене беларускай мовы на расійскую з Міністэрства ўнутраных спраў не паступала.