На сядзібе Рыгора Барадуліна ва Ушачах адкрыўся 23-і пленэр Цэнтра імя Язэпа Драздовіча

Сярод вядомых беларусаў на імпрэзе прысутнічалі Алесь Марачкін, Валянціна Барадуліна, Святлана Баранкоўская ды іншыя. На пачатку мерапрыемства галоўны арганізатар пленэра Ада Райчонак выказала словы падзякі ўсім прысутным за падтрымку, у тым ліку прадстаўнікам Ушацкага райвыканкама.

- Думаю, што наш пленер будзе плённы. Мы вельмі хочам, каб пленер паклаў пачатак музею нашага любімага паэта Рыгора Барадуліна.

Пленэр ва Ушачах будзе працаваць тыдзень, паведамляе «Радыё Рацыя». Па яго заканчэнні там зладзіцца выстава, а потым і ў іншых гарадах Беларусі. Маладыя ж скульптары Элеанора Данэсевіч і Яўген Малыш абяцаюць зрабіць выяву з дрэва з керамічнымі ўстаўкамі Рыгора Барадуліна, якая будзе знаходзіцца ў будучым музеі паэта.