На геральдычным знаку ў Шклове з'явіўся надпіс і па-беларуску

На старой шыльдзе, якая таямніча знікла, беларускамоўнага адпаведніка назвы гораду не было, што выклікала крытыку рупліўцамі беларускай мовы мясцовага чынавенцтва. Чыноўнікаў вінавацілі ў непаважлівым стаўленні да нацыянальнай мовы беларусаў. Жыхар Шклова намеснік старшыні партыі БНФ Рыгор Кастусёў не выключаў, што будзе скардзіцца Аляксандру Лукашэнку, каб абараніць у Шклове беларушчыну.

Пра знікненне шыльды з расейскамоўным надпісам стала вядома 31 ліпеня. Галоўны архітэктар Шклоўскага раёну Георгій Сіваеў заявіў тады «Радыё Свабода»: «Шыльду знялі вандалы, і іх ужо шукае МУС. І знойдзе, бо там усталяваная відэакамера». Разам з тым у аддзеле міліцыі сказалі, што ніякіх заяваў пра знікненне шыльды ім не паступала.

Паводле Рыгора Кастусёва, шклоўскія чыноўнікі наўмысна прыдумалі вандалаў, каб не прызнаваць сваёй памылкі ў напісанні на шыльдзе назвы гораду толькі на расейскай мове.

Краязнаўца Аляксандар Грудзіна, стоячы непадалёк ад геральдычнага знаку, на які ўсталёўвалі новую шыльду, заўважыў, што дата заснавання гораду на ёй засталася ранейшая — 1535 год.

Паводле гістарычных крыніц, у гэты год Шклоў быў захоплены і спалены расейскім ваяводам Васілём Шуйскім. Афіцыйна гэтую падзею і звязваюць з заснаваннем гораду.

«Гэтая дата перадалася Шклову з савецкіх часоў. І дагэтуль яе выкарыстоўваюць, нібыта працягваюць жыць у Савецкім Саюзе», — даводзіць Аляксандар Грудзіна. Ён кажа, што вядомыя ранейшыя згадкі Шклова. Яшчэ ў 1520 годзе яго апісаў аўстрыйскі дыпламат Сігізмунд фон Герберштэйн.