Гісторыка-культурныя каштоўнасці няма каму і за што рэстаўраваць

Зафіксаваныя толькі адзінкавыя выпадкі эфектыўнай рэстаўрацыі аб’ектаў архітэктурнай спадчыны. Дзяржава не ў стане самастойна захаваць помнікі архітэктуры, а прыватныя інвестары не маюць жадання ўкладаць сродкі, паведамляе радыё "Рацыя".

Выхад з сітуацыі пакуль не знойдзены, зазначае намеснік начальніка ўпраўлення культуры Гарадзенскага аблвыканкама Алена Клімовіч:

- Канешне вельмі шмат праблем, вельмі шмат пытанняў, якія нам яшчэ неабходна вырашыць і бываюць такія выпадкі, калі не ўсё залежыць толькі ад жадання добра гэта зрабіць. Шмат залежыць ад фінансавання і немагчыма адначасова фінансаваць рэстаўрацыйныя аднаўленчыя працы на ўсіх аб’ектах разам.

Паводле дадзеных Гродзенскага аблвыканкама, на тэрыторыі рэгіёна ў спіс гісторыка-культурных каштоўнасцяў уключана больш за 720 аб’ектаў. Сярод іх -  301 помнік архітэктуры, 326 помнікаў археалогіі, 96 -  гісторыі і 4 мастацтва.

Журналісты "Рацыі" прыводзяць прыклад Старога замку ў Гародні.  У дзяржаўную праграму “Замкі Беларусі” ўключана шэсць замкаў, якія знаходзяцца на тэрыторыі Гарадзенскай вобласці. У той час як у Мірскім замку рэстаўрацыйныя працы скончаныя, рамонтна-аднаўленчыя працы пачаліся ці працягваюцца ў Гародні, Наваградку, Лідзе, Гальшанах і Любчы. Нягледзячы на тое, што фінансаванне будаўнічых працаў ажыццяўляецца паводле дзяржаўнай праграмы, памеры ўкладанняў зусім не адпавядаюць патрэбным аб’ёмам. Прыкладам, пачатак праектных працаў у гарадзенскім Старым замку прафінансаваны ў памеры толькі 5 мільярдаў рублёў, у той час як сродкаў патрабуецца ў дзясяткі разоў болей.