Чатыры суддзі адразу вызваленыя ад сваіх пасад у Эканамічным судзе Мінска

Аляксандр Лукашэнка сваім указам ад 2 ліпеня адхіліў ад займаных пасад адразу чатырох суддзяў Эканамічнага суда Мінска. Прычына - правіна, не сумяшчальная са знаходжаннем на дзяржаўнай службе.

Пасад пазбавіліся былы старшыня Эканамічнага суда Мінска Ігар Ждановіч, яго намеснік Сяргей Кулакоўскі, суддзі Алег Клюйко і Андрэй Рыбалкін, паведамляе nn.by.

"Ініцыятарам прыцягнення да дысцыплінарнай адказнасці названых асоб выступіў Вярхоўны суд. Факты здзяйснення дзеянняў, несумяшчальных з высокім званнем суддзі, выяўленыя ў ходзе праведзенай праверкі, знайшлі сваё пацвярджэнне. У прыватнасці, пацверджаны непрацэсуальныя зносіны названых асоб з прадстаўнікамі бакоў да вынясення рашэння па справе, каб дагадзіць асабістым інтарэсам", - паведамілі ў прэс-службе Вярхоўнага суда.

Праўда, непрацэсуальныя зносіны - гэта даволі шырокая фармуліроўка. Гэта магло быць абмеркаванне мяркуемага рашэнне з тым, супраць каго яно прымалася.

Між іншым, суддзя Кулакоўскі сёлета разглядаў справу кнігарні "ЛогвінаЎ". А ў лютым 2015 быў затрыманы суддзя Эканамічнага суда Мінска Юрый Грушэцкі. Яго вінавацяць у атрыманні хабару.