Музей Быкава - пад замком

Летась у Ждановічах пад Мінскам быў урачыста, з удзелам міністра культуры, адчынены Музей-лецішча Васіля Быкава - да 90-годзьдзя народнага пісьменніка.

Былі сказаны патасныя словы пра тое, як Мінкультуры клапоціцца пра ўшанаваньне памяці вялікага творцы, не шкадуе на гэта сродкаў. І гэта пры тым, што дзяржава ў будаўніцтва музtю ня ўклала ні капейкі - лецішча было падараванае ёй удавой пісьменніка Ірынай Міхайлаўнай Быкавай, паведамляе "Радыё Свабода".

На жаль, новаствораны музэй працаваў усяго некалькі месяцаў. Сённяшнія наведнікі могуць пабачыць толькі вялікі замок на ўваходнай браме. Пра сітуацыю вакол мемарыяльнага лецішча распавёў яго былы загадчык Алесь Гібкоўскі:

- Для мяне зразумела, як двойчы два: асоба Быкава, як нішто іншае і ніхто іншы, можа аб’яднаць усіх беларусаў. Нават мова нас усіх не можа аб’яднаць, нават рэлігія, а Быкаў – можа. У звязку з тымі падзеямі, якія адбываюцца сёння ва Украіне, беларуская дзяржава павінна думаць найперш пра нацыянальную кансалідацыю. А тут проста сабатаж нейкі. Такія адносіны да імя Быкава, ды яшчэ напярэдадні прэзідэнцкіх выбараў, мне абсалютна незразумелыя. Той “капітальны рамонт”, пра які гаворыць адміністрацыя, можа было б зрабіць за пару тыдняў, не зачыняючы музэй.