На рахунку гомельскага журналіста сёлета ўжо 6 пратаколаў за працу без акрэдытацыі

Пратаколы склалі міліцыянты Буда-Кашалёўскага РАУС і Цэнтральнага РАУС Гомеля. У абодвух выпадках падставай сталі відэаматэрыялы, паказаныя на тэлеканале «Белсат».

Начальнік аддзела грамадскага правапарадку і прафілактыкі Цэнтральнага РАУС Гомеля Юрый Панін піша ў пратаколе, што 15 красавіка на тэлеканале «Белсат» быў паказаны сюжэт пад назвай «Самагубства выкладчыцы». Паводле пратакола, “сюжэт незаконна вырабіў грамадзянін Кастусь Жукоўскі, які не мае акрэдытацыі на тэрыторыі Рэспублікі Беларусь у якасці карэспандэнта польскага тэлеканала". Відэа было прысвечана сітуацыі вакол самагубства выкладчыцы ГДУ імя Ф.Скарыны, якая апасалася страціць сваю працу і кватэру з-за дзеянняў кіраўніцтва ВНУ.

Аналагічны пратакол склалі і супрацоўнікі Буда-Кашалёўскага РАУС – за сюжэт на тэлеканале «Белсат» пра знос вясковых хат у часе падрыхтоўкі да абласных “Дажынак”, паведамляе прэс-служба Беларускай асацыяцыі журналістаў.

Такім чынам, усяго ў дачыненні да журналіста-фрылансера Кастуся Жукоўскага сёлета міліцыя склала ўжо 6 адміністрацыйных пратаколаў: 5 – на “незаконны выраб прадукцыі СМІ”, 1 – нібыта за ўдзел у несанкцыянаваным пікеце інваліда-вазочніка са Светлагорску, які фрылансер здымаў на відэа.

Паводле трох пратаколаў Жукоўскі агулам аштрафаваны судамі на суму 16,2 мільёна рублёў.