На журналістку з Брэста Аліну Літвінчук завялі чарговую адміністрацыйную справу

Копію пратакола яна атрымала па пошце, паведамляе прэс-служба БАЖ. З дакумента за подпісам супрацоўніка міліцыі Анатоля Чарнавокага вынікае, што 4 красавіка 2015 года Літвінчук, “не маючы акрэдытацыі ў якасці журналіста на тэрыторыі Рэспублікі Беларусь, узяла інтэрв'ю ў актывісткі Алены Каховіч, якое ў далейшым было размешчана ў камп'ютарнай сетцы Інтэрнэт на сайце польскай радыёстанцыі Радыё Рацыя, чым парушыла патрабаванне артыкула 36 Закона Рэспублікі Беларусь ад 2008 года “Аб сродках масавай інфармацыі”, чым здзейсніла незаконны выраб прадукцыі сродкаў масавай інфармацыі”.

Аліна Літвінчук лічыць гэта мэтанакіраваным пераследам за журналісцкую дзейнасць. Па яе словах, улады па-ранейшаму ігнаруюць Асноўны Закон краіны, бо Канстытуцыя дазваляе грамадзянам збіраць і распаўсюджваць інфармацыю. Акрамя таго, не выконваюцца нормы ратыфікаваных Беларуссю міжнародных пагадненняў.

У 2015 годзе суды двойчы пакаралі Аліну Літвінчук штрафамі, агульны памер якіх склаў 70 базавых велічынь. (13 студзеня яе аштрафавалі на 30 базавых велічынь, а 16 лютага – яшчэ на 40 базавых велічынь, прычым на другі з гэтых судоў журналістку не запрасілі.) З сутнасцю яшчэ адной адміністрацыйнай справы журналістку пакуль не азнаёмілі - яна ведае пра яе толькі ад міліцыянтаў.