Напрыканцы мая ў Мінску пройдзе Міжнародны кангрэс беларусістаў

Будучы кангрэс мяркуецца ў якасці першага з мерапрыемстваў, прымеркаваных да 500-годдзя беларускага і ўсходнеславянскага кнігадрукавання.

Падчас правядзення кангрэса прапануецца захаваць ранейшую практыку тэматычных блокаў пры фарміраванні праграмы. У сувязі з гэтым ў запрашаем да удзелу ў фарміраванні або ўнясенні змен і дапаўненняў у тэматычныя блокі і круглыя сталы у падчас VІ Кангрэса беларусістаў, паведамляе аргкамітэт Кангрэсу. Пасяджэнні VІ Кангрэса беларусістаў будуць ахопліваць даследаванні ў наступных гуманітарных і сацыяльных навуках:

Мовазнаўства

Літаратуразнаўства

Культуралогія

Гісторыя

Фалькларыстыка

Этналогія

Міжнародныя адносіны

Заяўка на правядзенне тэматычнага блока ўключае:

1. Галіна ведаў.

2. Імя і прозвішча кіраўніка блока, краіна, горад, установа, пасада.

3. Назва блока (указанне дзвюх варыянтных назваў вітаецца).

4. Кароткае абгрунтаванне актуальнасці праблематыкі (50-100 слоў).

5. Імёны і прозвішчы 4-х або 3-х дакладчыкаў з указаннем краін, гарадоў, устаноў, навуковых званняў, пасад. Назвы дакладаў з анатацыямі-рэзюмэ (не больш за 30-40 слоў) да кожнага даклада.

6. Імя і прозвішча дыскутанта па дакладах з указаннем краіны, горада, установы, навуковага звання, пасады.

Пасяджанні тэматычных блокаў

Пасля заслухоўвання дакладчыкаў і дыскутанта абмеркаванне на пасяджэннях тэматычных блокаў будзе адбывацца ў форме свабоднай дыскусіі. Афіцыйныя дыскутанты павінны атрымаць тэксты дакладаў для папярэдняга азнаямлення не пазней чым за месяц да кангрэса.

Крытэрыі адбору тэматычных блокаў

Адным з крытэрыяў адбору заявак будзе наяўнасць у складзе блока удзельнікаў з розных краін. Удзел у блоку прадстаўнікоў розных беларускіх гарадоў таксама будзе спрыяць станоўчай ацэнцы блока.

Заяўкі, укамплектаваныя з прадстаўнікоў аднаго горада або адной установы (аднаго ўніверсітэта), разглядацца не будуць.

Заяўкі на правядзенне тэматычных блокаў прымаюцца ад кіраўнікоў блокаў па электроннай пошце па адрасе [email protected]

Для разгляду заявак будзе створаны праграмны камітэт, які разгледзіць заяўкі і прапановы і паведаміць аб далейшых кроках падрыхтоўкі да Кангрэса.