Вайсковыя самалёты зладзілі рэпетыцыю параду Перамогі над Мачулішчамі

4 траўня прайшлі дзве трэніроўкі з самалётамі, што рыхтуюцца да ўдзелу ў вайсковым парадзе ў Дзень Перамогі. У першай палове дня ўдзельнікі параду праляцелі над Заслаўскім вадасховішчам пад Мінскам. У другой палове дня яны ляталі ў раёне свайго аэрадрома — 50-й змяшанай авіяцыйнай базы ў Мачулішчах (Мінскі раён), паведамляе БелаПАН.

У трэніроўках ўдзельнічала авіяцыя як беларускіх, і расійскіх узброеных сіл.

Дарэчы, упершыню ў парадзе ў Мінску возьмуць удзел найноўшыя расійскія знішчальнікі-бамбавікі Су-34, вучэбна-баявыя Як-130. Яны ўжо прыляцелі ў Мачулішчы. Далёкія бамбардзіроўшчыкі Ту-22М3 і стратэгічныя бамбавікі Ту-95МС расійскага войска прылятаюць у Беларусь на трэніроўкі да параду з месцаў свайго базавання.

Агулам 9 траўня над Мінскам праляціць больш за 40 ваенных самалётаў.