Віктар Лукашэнка катаўся па Мінску разам з байкерамі і ўскладаў кветкі да стэлы

Памочнік прэзідэнта ў пытаннях бяспекі Віктар Лукашэнка прыняў удзел у байкерскім прабегу, які адбыўся ў Мінску 25 красавіка.

Калона матацыклістаў адправілася ад салона Harley-Davidson па праспекце Незалежнасці да стэлы "Мінск - горад-герой" на скрыжаванні праспектаў Пераможцаў і Машэрава, піша "Наша Ніва".

Цікава, што дзяржаўнае інфармагенцтва БЕЛТА не акцэнтавала ўвагу на ўдзел сына Аляксандра Лукашэнкі ў акцыі.

У гэты ж дзень у Беларусь уехала група расійскіх байкераў з гурту "Начныя ваўкі". Яны маюць намер даехаць да Берліна праз Польшчу і іншыя краіны. Польшча, Чэхія і Нямеччына мелі намер забараніць іх праезд, бо ён, на думку многіх, носіць правакацыйны характар.

Адзначым, што "Начных ваўкоў" у Беларусі сустракалі на ўзроўні Адміністрацыі прэзідэнта. У прыватнасці, у імпрэзе ўдзельнічаў намеснік кіраўніка Адміністрацыі прэзідэнта Ігар Бузоўскі.

На Кургане Славы "Начных ваўкоў" сустракалі таксама прадстаўнікі ўладаў Мінскай вобласці і члены БРСМ.

Пасля Кургана Славы расійскія і беларускія ўдзельнікі мотапрабегу наведалі мемарыяльны комплекс "Хатынь". Сёння, 27 красавіка, байкеры будуць у Брэсце, наведаюць Брэсцкую крэпасць, а потым паедуць на Захад.