Яшчэ адну журналістку судзяць за супрацу з замежнымі СМІ без акрэдытацыі

Іне Хоміч патэлефанавалі з раённага суда і паведамілі, што яна не з’явілася на паседжанне. Пры гэтым позвы ў суд журналістцы не дасылалі. Праз тэлефон сакратарка паведаміла новую дату судовага паседжання –1-га красавіка а 9-й гадзіне раніцы.

Журналістка прыгадвае, з чым звязаная яе справа:

- Справа звязаная з працай на замежнае СМІ без акрэдытацыі – класічны выпадак. У Іванаве я брала каментар наконт адкрыцця Музею хлеба ў Мотылі, што ў Іванаўскім раёне. І мясцовыя спецслужбы завялі справу і адправілі ў міліцыю.

Іна Хоміч збіраецца 1 красавіка прысутнічаць на судовым паседжанні ў сваёй справе, якая тычыцца супрацы з «Радыё Рацыя». Прыгадаем, што іншага берасцейскага журналіста – Алеся Ляўчука – некалькі дзён таму прысудзілі да штрафу ў памеры 21-ой базавай велічыні без яго прысутнасці на судзе. Журналіста пакаралі за супрацу з тэлеканалам “Белсат”. Раней падобным чынам была пакараная Тамара Шчапёткіна з Бярозы, якой прысудзілі 40 базавых велічынь штрафу.