Амаль па 200 мільёнаў рублёў патрабуе дзяржава за прыватызацыю дамоў у вёсцы на Гомельшчыне

Вёска Жураўлёўка месціцца кіламетраў за сорак на поўдзень ад Гомеля. Мясціны тут ці не самыя чыстыя ў рэгіёне, які пасля Чарнобыля быў моцна ўсеяны радыяцыйным попелам, але вёска памірае. 

Апошніх яе жыхароў, якія працавалі ў тутэйшай падсобнай сельскай гаспадарцы Гомельскага радыёзавода, той жа завод, па сутнасці, выжывае. Хоць зямлянкі ў лесе капай, кажуць жураўлёўцы, бо за прыватызацыю трухлявых дамоў радыёзавод патрабуе цяпер ад 138 да 193 мільёнаў рублёў пры заробках у 2 мільёны, паведамляе БелаПАН. 

Мясцовая жыхарка Валянціна Панамарова: "Мой дом ацанілі амаль у 140 мільёнаў. Гэты кошт для мяне няўздымны. Заробак цяпер у мяне мільён 200 тысяч. Як я магу сабраць радыёзаводу за год першапачатковы ўзнос у 14 мільёнаў? І за што такія цэны? Хоць бы начальнікі прыехалі і паглядзелі. Дык гэта мы яшчэ кожны год фарбуем, шпалеры клеім, усе дзіркі замазваем, каб цяпло менш выдзімала".

Алена Катлярова, былая свінарка, а цяпер сацыяльны работнік па догляду нямоглых вяскоўцаў, якая жыве ў доме № 105, лічыць, што пры ацэнцы дамоў ніхто не звяртае ўвагі на іх першапачатковы кошт.