Dzieciuki сталі "Героямі году"

У сталічным клубе "Піраты" абвесцілі вынікі музычнай прэміі ад парталу Tuzin.fm.

Героямі 2014 году ў беларускай музыцы прызнаны гарадзенскі фольк-панк гурт Dzieciuki. Каманда складаецца з музыкаў, якія былі задзейнічаныя ў гурце "КальЯн", частка з іх грае таксама ў праекце "Людзі на балоце".

На меркаванне рэдакцыі Tuzin.fm менавіта гэты гурт заслугоўвае сёлета пачэсную ўзнагароду. Dzieciuki выдалі ў лютым дэбютны альбом "Гарадзенскі гармідар". Яго прэзэнтацыя на Tuzin.fm выклікала вялікі інтарэс - матэрыял стаў самым чытаным па выніках 2014 году. Іх песні стала знаходзяцца ў топ-12 паводле праслухоўванняў на канале Tuzin.fm на Soundcloud.

Музыкі таксама знялі за год чатыры кліпы, паўдзельнічалі ў праекце "Re:Песьняры" ды з'ездзілі ў тур па Еўропе, дзе далі 14 канцэртаў за 14 дзён.

У намінацыі "Адкрыццё году" найлепшым прызнаны Сяргей Башлыкевіч і яго гурт Leibonik. Ён пераехаў у Менск з Ашмянаў. Выступае як сольны спявак і разам з гуртом. Акрамя ўласных твораў любіць выконваць песні вельмі розных выканаўцаў, часам цалкам пераасэнсаваныя - ад Аляксандра Башлачова і Боба Дылана да Ланы дэль Рэй.

Асаблівай папулярнасьцю на яго канцэртах карыстаецца песьня "О, Купала" - пераробка сусветнага поп-хіта другой паловы 80-х Rock Me Amadeus. Сяргей звярнуў на сябе ўвагу сёлета, ён даў шэраг паспяховых сольных канцэртаў і стаў лаўрэатам фестывалю "Бардаўская восень".