Беларускія інтэрнэт-актывісты вылучаць на прэзідэнцкія выбары-2015 кандыдатуру Гэндальфа

Галоўныя патрабаванні да кандыдатаў — 35 гадоў, беларускае грамадзянства і «дастатковая адэкватнасць». Стваральнікі суполкі «Мая краіна Беларусь» кажуць, што «праца ня пыльная» і абяцаюць будучаму кандыдату дапамогу ў кампаніі і зборы подпісаў, паведамляе «Радыё Свабода».

На вылучэнне Гэндальфа ў прэзідэнты натхніў украінскі Дарт Вэйдэр, які балатаваўся на прэзідэнцкіх выбарах ва Украіне, але ня быў зарэгістраваны.

Паводле арганізатараў, Гэндальф — добры чараўнік і сябра хобітаў, а хобіты, як вядома, падобныя да беларусаў. Як лічыць доктар Лант з Брыстальскага ўнівэрсытэту (Вялікабрытанія), Шыр — зелянінны край, дзе жылі хобіты, — нагадвае Беларусь.

Вылучэнне на прэзідэнцкія выбары Гэндальфа, паводле арганізатараў, мае мэтай высмеяць рэжым і прадэманстраваць, што выбараў у краіне няма.

Як заявіў адзін з ініцыятараў, які называе сябе Арагорнам, сынам Араторна, кампанія будзе пабудаваная на пазітыве і аб’яднае ўсіх беларусаў, якія хочуць лепшага жыцьця:

«Спокліч нашай кампаніі просты і зразумелы. Гэндальф — наш лідар, які павядзе краіну да лепшага жыцця. Гэндальф — наш кандыдат».