Пачалicя суды над удзельнiкамi журналісцкай фотасесіі ў Віцебску

Нагадаем, напярэдадні 5 лістапада, Сусветнага дня “Станем за журналістыку”, група віцебскіх сябраў ГА “БАЖ” сфатаграфавалася на фоне будынка з вядомым гарадскім графіці – выявамі клетак, з якіх вылятаюць зробленыя з газеты птушкі. Супольнае фатаграфаванне – гэта адзін з самых распаўсюджаных спосабаў адзначыць кампанiю “Станем за журналістыку”, які шырока практыкуецца журналістамі ва ўсім свеце.
Аднак беларуская мiлiцыя ўбачыла ў фатаграфаваннi парушэнне заканадаўства. 

Як паведамляе прэс-служба ГА "Беларуская асацыяцыя журналістаў", слуханні адміністрацыйных справаў журналістаў, якія сфатаграфаваліся на фоне гарадскога графіці напярэдадні 5 лістапада, адбываюцца сення ў судзе Чыгуначнага раёна г. Віцебска.

Зміцер Казакевіч і Алена Сцяпанава ўжо атрымалі штрафы ў 20 базавых велічыняў за парушэнне арт. 23.34 КаАП (парушэнне парадку арганізацыі альбо правядзення масавых мерапрыемстваў).

У гэтыя хвіліны адбываецца судовы працэс па справе Алены Шабуні. Па звестках службы маніторынгу ГА “БАЖ”, усяго заведзена сем адміністрацыйных спраў. Наступныя суды прызначаныя на 1 снежня.

26 лістапада група сябраў Еўрапейскай федэрацыі журналістаў (ЕФЖ) сфатаграфавалася з такімі самымі папяровымі клеткамі і птушкамі, якія трымалі ў руках віцебскія БАЖаўцы ў часе фотасесіі “Станем за журналістыку”. Удзельнікі брусельскай фотасесіі трымаюць у руках таблічкі з пытаннем “Хіба гэта злачынства?”

“Гэта зроблена дзеля таго, каб паказаць недарэчнасць міліцэйскіх абвінавачанняў”, – гаворыцца ў прэс-рэлізе на сайце ЕФЖ. Арганізацыя нагадвае таксама пра сумесны ліст ГА “БАЖ” і ЕФЖ да віцебскіх уладаў з заклікам адмяніць выстаўленыя журналістам абвінавачанні.