Не даваць у эфір песні на беларускай мове - палітыка дзяржаўнага радыё "Віцебск"

Тое, што большасць беларускіх радыёстанцый лічаць кампазіцыі жорсткім нефарматам толькі за тое, што яны праспяваныя на беларускай мове, пацвердзілася чарговы раз, паведамляе tuzin.fm.

Лідар гурту HandmadE Яўген Валошын сутыкнуўся з адмовай, калі прапанаваў да ратацыі на радыё «Віцебск» сваю новую кампазіцыю «Нямое кіно». Музычны рэдактар радыёстанцыі Дар’я Пацехіна, атрымаўшы кампазіцыю, адразу папярэдзіла ў карэктнай форме, што кампазіцыі на беларускай мове яны не ставяць.

«Не хачу, каб гэта выглядала на скаргу, бо дзяўчына з радыё з увагаю паставілася да майго звароту, паслухала, адказала. Проста такая сітуацыя склалася канкрэтна ў Віцебску, я думаю. Даюць свае вынікі помнікі прарасійскім дзеячам. Ды яшчэ можа недагляд мясцовага аддзела культуры, які курыруе гэтае радыё», – пракаментаваў гэты выпадак лідар HandMadE.

Песні гэтага гурту раціруюцца на іншых беларускіх дзяржаўных радыёстанцыях, у прыватнасці на радыё «Гродна», «Мінская хваля», радыё «Сталіца». Гурт таксама пастаянна запрашаюць на здымкі тэлеканал АНТ.