Чытачы абралі Алексіевіч, але прэмію атрымаў былы вайсковец Прылепін

Личности

Сёлета расейскую прэмію "Вялікая кніга" атрымаў раман Захара Прылепіна "Обитель". Другая прэмія ў Уладзіміра Сарокіна за раман "Теллурия", а трэцюю атрымаў Уладзімір Шароў за кнігу "Возвращение в Египет", паведамляе "Радыё Свабода".

Пры гэтым, паводле апытання на сайце прэміі, чытачы аддалі перавагу кнізе беларускай пісьменьніцы Святланы Алексіевіч "Час сэканд-хэнд".

Прэміяльны фонд прэміі "Вялікая кніга" складае 6,1 млн расейскіх рублёў. 

Напярэдадні вызначэньня пераможцаў Святлана Алексіевіч паведаміла, што вельмі некамфортна пачуваецца ў шорт-лісце разам з Захарам Прылепіным: 

"Адчуваю сябе вельмі, вельмі некамфортна. Справа ў тым, што гэты чалавек абсалютна іншых перакананняў. Я лічу, што пісьменнік, які прапаведуе вайну, абараняе яе і яму гэта падабаецца, - гэта не пісьменнік, не прафесіянал. Гэта чалавек нейкай іншай прафесіі".

24 лістапада скончылася традыцыйнае чытацкае галасаванне "Вялікая кніга", паводле якога першае месца атрымала Святлана Алексіевіч. Захар Прылепін - на другім.

"У народным галасаваньні я перамагла Захара Прылепіна. Гэта мяне пераканала ў тым, што ня ўсе тут з'ехалі з глузду і ня ўсіх захапіла мілітарысцкая гістэрыя. Мне здаецца, што людзі самі збянтэжаныя і разгубленыя. Ёсць нармальныя людзі. Народнае галасаванне мяне вельмі парадавала. Нават не з-за таго, што я перамагла, а з-за таго, што не атрымаў першае месца Захар Прылепін, які вельмі нахабна ішоў да перамогі".