Павел Севярынец навучыць крэатывіць і ладзіць канцэрты

Заснавальнік курсаў - сустаршыня огкомитета партыі "Беларуская хрысціянская дэмакратыя" (БХД), былы палітвязень Павал Севярынец распавёў, што на курсах вучаць  маладых актыўных людзей займацца арганізацыйнай працай.

- Рыхтуюцца людзі, якія могуць праводзіць яркія мерапрыемствы, канцэрты, арганізоўваць разнастайныя шоў, быць грамадскімі лідэрамі, крэатывіць ў галіне PR - і пры гэтым закладваць каштоўнасны падмурак для маладога пакалення, - цытуе Севярынца прэс-служба БХД.

Падрыхтоўка вядзецца адразу па некалькіх кірунках: інфармацыйныя тэхналогіі, псіхалогія масавая ды індывідуальная, практычныя выпрабаванні. Будучыя ды-джэі адпраўляюцца, так бы мовіць, "з парашутам” у глыбокія беларускія мястэчкі, каб праводзіць там шоў Беларушчыны, камандна робяць акцыі, якія павінны трапіць у нацыянальныя СМІ, арганізоўваюць віктарыны і гэтак далей.

Увесь працэс заснаваны на тым, што за кожнае хатняе заданне, за кожнае выпрабаванне, за кожны выступ ды-джэям налічваюцца балы. Пачатковы рэйтынг даецца пасля тэсту. І 12 лепшых - паводле гэтага рэйтынгу - урэшце становяцца пераможцамі курсаў.

Пачыналіся курсы "Дыджэі Адраджэння" у 1999-м у арганізацыі "Малады Фронт". За ўсю гісторыю курсаў было падрыхтавана амаль 100 ды-джэяў.