Мікалая Статкевіча перавядуць з турмы ў калонію

Былога кандыдата ў прзідэнты Мікалая Статкевіча праз два месяцы мусяць перавесці з турмы ў калонію. Праз 2 месяцы, 12 студзеня 2015 скончыцца трохгадовы тэрмін пакарання Статкевіча турмой, піша "Радыё Свабода". Жонка палітвязня Марына Адамовіч разлічвае, што яе мужа вернуць у шклоўскую калонію, дзе яму застанецца адбыць ад агульнага тэрміну яшчэ 2 гады.

Нагадаем, экс-кандыдат ў прэзідэнты Мікалай Статкевіч асуджаны на 6 год зняволення нібыта за арганізацыю масавых беспарадкаў 19 снежня 2010 года. Сваёй віны палітык не прызнаў і адмовіўся падпісваць прашэнне аб памілаванні да Лукашэнкі. Знаходзіцца Статкевіч у крытай турме ў Магілёве.

Жонка палітвязня Марына Адамовіч расказала журналістам, што ў лісце Статкевіч уступіў у завочную палеміку з Лукашэнкам адносна шляхоў развіцця беларускай мовы:

"Прачытаў у газетах, што галоўны начальнік прапанаваў трэцюю гадзіну беларускай мовы ў школах. Крок неабходны, але неэфектыўны без стварэння матывацыі - ведаць мову для жыццёвага поспеху. Беларусы вельмі прагматычная нацыя і не будуць масава прыкладваць намаганні, каб ведаць мову, калі ад гэтага ня будуць залежаць паступленне ў ВНУ, паспяховая вучоба ў ВНУ, паспяховая кар’ера".

Яшчэ Мікалай Статкевіч напісаў пра тое, што з ягонага турэмнага дворыку ўжо не бачна сонца:

"У прагулачным дворыку ў адным з куткоў яшчэ ёсьць сонечная пляма, але яна ўжо занадта высокая, каб ўбачыць сонца, нават калі падскочыш".