Зміцер Вайцюшкевіч: Алена Танкачова – прыгожая, разумная жанчына, якая вельмі патрэбна Беларусі

5 лістапада кіраўніцу Цэнтра прававой трансфармацыі «Lawtrend» Алену Танкачову могуць дэпартаваць з Беларусі. У гэты дзень Упраўленне ўнутраных спраў адміністрацыі Першамайскага раёна Мінска разгледзіць справу пра высылку праваабаронцы з нашай краiны.

Падставай для гэтых рашэнняў стала перавышэнне хуткасці, зафіксаванае відэакамерам.

Наколькі адэкватным пакараннем з’яўляецца дэпартацыя праваабаронцы за перавышэнне хуткасці? Ці выпадкова гэтая сітуацыя ўзнікла напярэдадні прэзідэнцкай кампаніі? Што можна проціпаставіць дзяржаўнаму абсурду?

Сітуацыю вакол праваабаронцы Службе iнфармацыi "ЕўраБеларусi" каментуе музыка Зміцер Вайцюшкевіч, якога нядаўна выключылі з “чорных спісаў” пасля трохгадовага забыцця.

- Праваабаронцу Алену Танкачову пазбавілі віду на жыхарства плануюць дэпартаваць  з Беларусі за перавышэнне хуткасці. Наколькі адэкватнае пакаранне ўлады абралі для “злачынцы”?

- На Беларусі гадоў 20 адбываюцца падобныя сітуацыі: кагосьці садзяць, кагосьці высылаюць, а некага проста “просяць” памаўчаць. Сам я досыць спакойна стаўлюся да падобных гісторый.

Іншая справа, што за кожным такім здарэннем стаяць жывыя людзі. Алена Танкачова – прыгожая, разумная жанчына, якая вельмі патрэбна Беларусі.

- Арышты, зняволенні, пераслед іншадумцаў даўно не навіна для Беларусі, як вы правільна сказалі. Але падобныя дзеяні ўладаў, напярэдадні прэзідэнцкай кампаніі, набываюць выразную палітычную афарбоўку.

- Так, сапраўды набліжаецца нейкая палітычная кампанія. Але я не разумею, навошта яшчэ раз перапахваць поле, тысячы разоў узаранае. Сітуацыя ў краіне і так знаходзіцца пад татальным кантролем,  таму чарговая зачыстка палітычнай і грамадскай прасторы проста губляе сэнс.

- Спадар Зміцер, вы як ніхто іншы, бадай, ведаеце, што значыць апынуцца “па-за законам” без усялякай прычыны: толькі нядаўна вас выключылі з “чорных спісаў” музыкаў пасля трохгадовай забароны. Што можна проціпаставіць дзяржаўнаму абсурду?

- Я б вельмі хацеў, каб беларуская ўлада прымала мудрыя рашэнні. Час канфліктаў павінен прайсці, перад Беларуссю паўсталі зусім іншыя выклікі. Калі дзяржава дэкларуе нейкую адлігу, ці адкручванне гаек, заўсёды можна вырашыць сітуацыю ці праблему з карысцю для Беларусі.