Палітолага Карбалевіча ў аэрапорце Франкфурта затрымала нямецкая паліцыя

Вядомага беларускага палітолага Валерыя Карбалевіча 2 лістапада затрымала нямецкая паліцыя ў аэрапорце Франкфурта-на-Майне. Ён меў афіцыйнае запрашэнне і накіроўваўся ў Страсбург на Сусветны форум за дэмакратыю ў складзе беларускай групы, запрошанай для азнаямлення з працай Рады Еўропы. Усе ўдзельнікі форуму змаглі прайсці памежны кантроль, а Карбалевіч — не:

«У мяне віза выдадзеная консульствам Славакіі. І гэта быў першы ўезд на тэрыторыю Шэнгена. Нямецкая паліцыя вырашыла, што я не маю права ўезду на тэрыторыю Германіі. Раней я быў перакананы, што магу прыехаць па ёй. Аказваецца, не магу», — сказаў Карбалевіч.

Зваротны квіток да Мінска ён мае толькі на 5 лістапада, перадае Еўрарадыё, таму да 5 лістапада Карбалевіч будзе чакаць у аэрапорце.

«Падчас пашпартнага кантролю 2 лістапада мне адмовілі ва ўездзе ў Германію. Але назад паехаць я не змог, таму што не было квітка. Я цяпер вымушаны чакаць серады ў аэрапорце, на сераду маю зваротны квіток у Беларусь. Буду чакаць у аэрапорце», — цытуе Радыё Свабода палітолага.