Віцебскі помнік Караткевічу перанясуць, каб пашырыць дарогу

Помнік Уладзімеру Караткевічу, усталяваны ў 1994 годзе на скрыжаванні вуліц Чэхава і Суворава, дэмантуюць і перанясуць у іншае месца - глыбей у сквер, які пачынаецца ад плошчы Леніна і ідзе да ўзбярэжжа Дзвіны. З нядаўняга часу ён называецца "Скверам у гонар 70-годдзя заснавання Віцебскай вобласці", піша Радыё "Свабода".

Недзе на гэтай самай "восі, якая пралягае ад будынка філармоніі да Дзввіны", знойдзецца месца і перанесенаму помніку, і новаму Сафійскаму сабору, які плануюць узвесці ў Віцебску.

Паводле слоў галоўнага віцебскага архітэктара Віталя Дубіка, пераносіць будуць і яшчэ адзін культурны аб’ект - будынак, у якім месціцца музей Міная Шмырова, помнік архітэктуры пачатку 20 стагодзьдзя. Яго таксама перанясуць і адновяць "недзе на тэрыторыі скверу".

Помнік Уладзімеру Караткевічу ўжо пераносілі, матывуючы гэта "перспектыўным развіццём гораду", - у Воршы. Гэта адбылося напярэдадні "Дажынак-2008". Якраз на месцы помніка пастанавілі збудаваць прыбіральню ў рэканструяваным Прыдняпроўскім парку. Пасля рэканструкцыі парк стаў называцца дзіцячым. І помнік пісьменніку-земляку, зроблены скульптарам Ігарам Голубевым, "перасялілі" ў атачэнне мульцяшных персанажаў - кракадзіла Гены, Чабурашкі, Нязнайкі ды іншых, паміж гушкалак і арэляў.

Ніякіх грамадскіх абмеркаванняў наконт пераносу помнікаў ні тады ў Воршы, ні цяпер у Віцебску не праводзілася.